突破既有想像 就有改變的可能：上環「十皇殿廣場」由刑場變成公共空間的過程

大家有時日常經過嘅公共空間，喺舊陣時原來都經歷過變革。呢啲改頭換面嘅街道改造嘅項目，可能可以成為今日檢討街道設計嘅參考例子。

「上環坊」上環文娛廣場係一項市區重建局成立初期嘅市區更新項目，包括西港城翻新、摩利臣街同鄰近街道改善同美化工程。當中文咸東街嘅改動，值得重新注意嘅地方，係將兩條單程路整合成一條雙程路，同時將細碎嘅行人空間整合成一個廣場。馬路交通喺廣場外圍兜過，唔影響廣場用家嘅安全，而且廣場俾原有建築物同店舖包圍，令到呢個廣場相當易搵易認。

雖然回望歷史，呢個叫做「十皇殿廣場」嘅路口曾經係人流聚集嘅廣場、市集、廟宇，甚至開埠初期連刑場都做過… 不過當上環街市（南座）、套用現代道路設計，甚至加設公廁同樹盆之後，呢個廣場人來人往嘅特質就出現咗轉變了！

「上環坊」呢個項目證明咗唔需要影響本來嘅行車方向嘅情況下，街道嘅路面空間透過整合同設計，仍然可以提供面積更大更完整嘅公共空間。如果政府繼續喺街道規劃上實行「人車絕對分隔」，呢個似乎都係一種試圖攞平衡嘅做法。

以市區更新為由嘅街道改善工程好少單一發生，通常都同建築重建一併處理，有時甚至封埋條街而成為將來建築物嘅一部分…封街嘅例子有荃灣大陂坊，同埋觀塘裕民坊。單純為咗保留條街嘅外形而將佢重建嘅例子，有稱為囍帖街嘅灣仔利東街。將來可能會有啲特色嘅，就係土瓜灣鴻福街一帶嘅「小區重建發展概念」，我哋尚且拭目以待。

另外根據市建局官網，街道改善工程仲有上環東街、旺角同大角咀一帶，前兩者冇涉及道路改道，後者亦其實毗鄰市區重建項目，令到我哋今日分享嘅「上環坊」改造方式更顯特別。提倡與籌劃行人專用區嘅組織「行德 Walk DVRC」現時喺呢個空間繼續想像，提出《上環樂》嘅項目，喺今年 9 月至 12 月，將會進行 90 日試驗計劃，將德輔道中由西港城至禧利街的兩個路段禁止車輛行駛，擺放休憩座位及遮蔭、綠化設施，提供地道小食及手工啤酒、教育活動，呢個街區又再次迎來轉變！ 各位有興趣嘅朋友，記住留意佢哋嘅活動資料喇～

十幾年前做到嘅嘢，而家又做唔做到？真係好視乎社會嘅決心。

文：Benny Yip
相：Joey Kwok

參考資料：
市建局官方資料：https://bit.ly/3BvtpZP
行德《上環樂》：https://bit.ly/3eJqcMw

原址有關歷史：
聖雅各福群會 松柏之聲第475期 （2017年3月刊）
https://charityservices.sjs.org.hk/thevoice/7

聖雅各福群會 松柏之聲第406期 （2011年6月刊）
https://charityservices.sjs.org.hk/thevoice/133