Trixi mirrors －關於一個 13 歲女孩的街道配置

英國倫敦運輸局 2010 年開始，喺路口交通燈增設交通凸鏡，協助大型車輛察看盲點，以防旁邊有單車緊隨轉彎導致意外發生。其實呢款交通凸鏡有名架喎！佢叫做 "Trixi mirrors"，究竟點解會起一個咁嘅名稱？原來係源自一宗交通意外，一個 13 歲嘅瑞士女孩子 Beatrix Willburger，踩單車時同一架中重型車輛相撞導致重傷，佢嘅爸爸因為咁而四處奔走提倡增設交通凸鏡，令到歐洲各處開始使用。因此呢款交通凸鏡就起用咗 Bea"trix" 嘅名字喇。

《衛報》2011 年報道指出，喺倫敦平均每個月都有一單車使用者因為交通意外死亡，仲有好多人重傷或者毀容。好多城市都經歷緊類似問題，例如大學城牛津、劍橋，由於學生普遍習慣使用單車出行，因此意外並不罕見，所以改善街道設施係不能怠慢嘅工作。

唔少涉及單車同大型車輛的事故，都因為司機受制於左側的視線盲點，無發現單車使用者在旁，一同左轉時把單車使用者捲入車底而導致慘劇發生。倫敦運輸局超級單車徑 (Cycle Superhighway) 項目總監 Nigel Hardy 表示：「呢款鏡可以為中重型車輛司機提供更加廣闊嘅視覺，同時可以向司機宣傳檢查後視鏡嘅習慣，提醒單車人士唔好喺中重型車輛嘅左手邊騎行。」

當然，增加 Trixi mirrors 並唔係一勞永逸，呢塊鏡唔係減少單車使用者同中重型車輛相關意外發生嘅靈丹妙藥。除咗實施《中重型車輛視線標準》，英國當局亦有喺街道嘅唔同角落增加標語，提醒單車使用者唔好靠近大型車輛騎行。減少意外發生，需要依靠各位道路使用者提高警覺，大型車輛司機需要時刻留意旁邊嘅情況，而單車使用者亦應避免靠近大型車輛，確保大家喺街道上安全活動。

大家有冇見到香港有出現 Trixi mirror？你又覺得需唔需要設置？

文：Jobie Yip

延伸閱讀：
【大型車輛盲點一直都在 問題在於運輸署闊佬懶理！（下）】
http://bit.ly/2O72f80

【運輸署需引入《中重型車輛視線標準》保障所有道路使用者】
https://bit.ly/3ztLkyR

參考資料：
New mirrors spearhead London bike safety drive https://bit.ly/382UHJx
TRIXI MIRRORS https://www.bikes.org.uk/trixi-mirrors/