灣仔海濱長廊你喜歡嗎？

由灣仔會展新翼連接至灣仔碼頭同灣仔北臨時交通交匯處的海濱長廊近日開始對外開放。特別受熱議嘅當然係灣仔碼頭外約1,800平方米嘅粉紅公共空間，該空間上星期公佈正式啟用。

點解粉紅色？政府新聞稿話：「色調與鄰近的「粉紅通道」互相呼應，營造出柔和溫馨的感覺。」至於，點解「粉紅通道」係粉紅色…？（無從稽考）

小編今日經過灣仔特登去湊下熱鬧，期間有唔同年紀嘅人打卡影相、有 OL 趁著中午喺度食飯透透氣、亦見到唔少街跑人士經過。雖然唔係人山人海，但絕對唔係冷清。不過，空間四周都仍然佈滿工地，沙塵滾滾，可能會影響整個使用觀感。

其實公共空間對於城市來講係非常重要，好似我哋之前提及嘅丹麥著名城市規劃師 Jan Gehl，佢曾經講過：「喺人類歷史中，城市一直係人類聚集嘅地方，大部分人類嘅文化都係源於公共空間。因此公共空間對於一個運作良好嘅城市係非常重要。」（“The city throughout the history of mankind has been the meeting place for people. Much of the culture of mankind has happened in the public space. Public space is a very important aspect of a good and well functioning city.”）真正嘅公共空間係一個不分身份階層，引發互動嘅地方，可想言之我哋應該要幾重視公共空間。

喜好的確係好因人而異，唔知你又點睇呢個新空間呢？