pinky 公園太標奇立異？

最近有個地方好多人著粉紅色衫去打咭。唔通教主 Anson Lo 現身？NO NO NO！係因為最近油尖旺區砵蘭街休憩花園變成鮮粉紅色，搖身一變成打咭熱點。有媒體到場訪問街坊，都有人認為色調有新鮮感。但都有不少人認為，鮮粉紅色帶有色情味道 (๑• . •๑)

同康文署合作、設計呢個「眾樂樂．園 」嘅 Design Trust 進行構想嘅時候，發現砵蘭街休憩花園面積唔大，但聚集了好多成人同長者，有人食煙、飲酒、賭博，同時有好多不當行為會喺公園發生…因此新裝修嘅公園設計多用途空間，希望注入新元素，吸引唔同年齡層嘅人都可以使用空間。但係點解要將成個公園變成鮮粉紅色呢？

設計團隊並無詳細的解說，不過原來 2013 年瑞士心理學家 Daniela Späth 進行過一項研究，發現粉紅色可以「舒緩情緒」。於是佢將瑞士一所監獄漆成粉紅色，經歷咗一段時間之後，發現囚犯平均嘅好鬥行為大大減少，精神狀態也更加放鬆。其實，以顏色影響心理嘅研究，早於 1979 年就出現過，美國科學家 Alexander Schauss 說服咗西雅圖兩位海軍軍官，將軍中禁閉室漆成粉紅色，藉此觀察粉紅色會唔會影響人類心理。結果發現粉紅色能夠「安定人心」，喺禁閉室內不但沒有鬥毆發生，本身好憤怒嘅監禁者更在短短 15 分鐘內冷靜落嚟。

如果粉紅色可以鎮靜人的情緒，或者可以透過呢類型的社區實驗改善附近空間的質素令社區變得更有舒適？