城市公共空間的想像
Amanda Burden 係美國紐約市嘅城市規劃師，喺 2002 至 2013 年間擔任過紐約市規劃委員會總監。平日佢喜歡觀察居住喺城市裡嘅人如何使用公共空間。佢認為公共空間會為人們生活帶嚟重大改變，改變人們喺城市嘅生活方式同對城市嘅睇法。喺演講中，佢分享過往嘅工作經驗和生活上嘅觀察，從而帶出「公共空間」對城市人嘅重要性。佢希望自己作為城市規劃師，能夠真正改變自己居住嘅城市，打造出更多令人們願意使用嘅公共空間。城市裡嘅空間充滿住不同嘅機會，商業投資機會和公共利益(Common Good) 亦可能在當中產生衝突。因此，佢認為好嘅公共空間並不會自然生成，而喺要極力爭取同著重每一個細節位，先能成功打造。
公共空間嘅重要性 ──「你會想去嗎？你會想喺嗰度逗留嗎？」
講者一開始就提到城市與人有密切嘅關係，人們喺城市中嘅流動構成左城市嘅運作，因此公共空間喺城市裡所發揮嘅角色比建築物更為重要。而家城市最明顯嘅轉變，正正喺呢啲公共空間中發生。要建設一個美好、宜居嘅城市，要從人類嘅角度去考慮同感受，先能夠設計出令人嚮往嘅公共空間。
公共空間嘅條件
講者以紐約曼哈頓市區一個袖珍型公園——帕里公園為例。佢坐喺帕里公園裡面，仔細觀察人們使用公共空間嘅情況，發現當中兩個吸引人使用嘅條件。
第一，公共空間裡有可以隨意移動嘅椅子。人們進入公園後，佢哋會搵一個位置，並且稍微移動坐椅，再停留一陣。當中有趣嘅係，當有人坐低，就會吸引到更多人坐喺旁邊。
第二，公共空間有足夠嘅綠化，講者認為帕里公園之所以成功吸引人們，除咗提供坐位外，附近仲佈滿咗花草樹木，可以令人感到放鬆和舒適。
講者認為公共空間嘅細節設計會大大影響人們對公共空間嘅感覺（例如砲台公園城），而佢所講嘅「設計」，不單指外觀上嘅設計，而係關於使用者身處喺空間裡嘅個人體驗。
公共空間與權力
城市裡嘅公共空間，例如道路、休憩公園等，都可以見到不同權力互相角力。講者喺高架公園 (High Line Park) 項目中就親身體驗到將不同空間取回作為公用並非易事，因為商業利益和公共利益往往出現衝突。世界知名嘅高架公園 (High Line Park)，由荒廢嘅高架鐵道搖身一變，成為人人嚮往嘅公園同行人天橋，每年吸引多達400萬人前嚟參觀。龐大嘅參觀人數唔單止意味住高架公園 (High Line Park) 嘅成功，喺發展商眼中更係充滿商機。故此，有發展商向政府建議沿住空中花園開設商店，希望藉此為紐約市帶來更多嘅經濟收益。然而，講者認為規劃城市需要有遠見，公共利益應喺商業利益之上，一旦開設商店，高架公園 (High Line Park) 就會由公園變成商場。
講者亦提到守護公用空間亦絕非易事，有當地大型發展商希望拆除高架公園 (High Line Park) 位於哈德遜園區嘅第三部分，以符合他們嘅發展計劃，並向當局提出希望「暫時拆除」該部份嘅鐵道。幸好，經過9個月來不斷協商，最後兩方訂立協議禁止拆除，先得以完整保留。
除咗高架公園 (High Line Park) 外，近年紐約市嘅一啲停車位 (Parking Space)，有部份慢慢變成臨時咖啡店 (Pop-up Cafe)。講者亦提到喺紐約市中心百老滙交通要道，由從前繁忙嘅車道，慢慢將更多嘅空間「還返俾」行人，劃出部分空間作休憩用途，擺放凳同枱，令人們有放慢、休息嘅空間。
昔日嘅街道以汽車為主，行人嘅空間往往較行車道少，行人在街道上嘅權力亦很少。但係，行人漸漸向呢個情況「作出反抗」，試圖將部分汽車佔據嘅空間變成行人嘅空間。
香港街道同公共空間嘅想像
番到去我們生活嘅城市，香港嘅街道由汽車主導。人們喺狹窄嘅街道裡穿梭，甚至被迫要喺馬路上行走，更莫講話可以喺道路上感受社區，可見行人嘅權利未有受到廣泛嘅關注。
試想像，如果有一日，彌敦道嘅行車線同車輛數目減少，將更多嘅空間劃為行人路同休憩空間，種更多嘅樹同擺放唔同嘅凳，人們可以隨意去用。唔知大家會唔會對我哋居住嘅城市有另一番體會呢？
好欣賞講者用以下嘅一番說話做總結：
“Public spaces always need vigilant champions, not only to claim them at the outside for public use, but to design them for the people who use them, then to maintain them to ensure that they are for everyone, that they are not violated, invaded, abandoned or ignored.”（公共空間總是需要機警的擁護者，不僅要在外面主張公共使用，而且要為使用者設計空間。盡力維護它，以確保空間為每個人服務，確保它不被侵犯、入佔、遺棄或忽視。）
你願唔願意成為其中一個街道空間議題嘅關注者呢？
資料來源：TED Talk - Amanda Burden: How public space make cities work https://bit.ly/3fPaReQ
文：Koji Hui