反對將西貢公路擴闊至四線雙程行車 應停止過度發展 積極鼓勵使用公共運輸往返

你好：

街道變革 Street Reset 對西貢公路改善工程二期的意見如下：我們反對將西貢公路擴闊至四線雙程行車，與其擴闊，我們認為政府應從速停止容許西貢承受更多發展，並積極鼓勵使用公共運輸往返。

1. 雖然擴闊至四線，的確能令公路容納更多車流，但並不會有效地改善整體嘅交通問題，因為最後只會吸引更多人（尤其訪客）揸車出入。綜觀外國先例，雖然公路擴闊後行程初期會快左，卻往往會因條路闊左、吸引更多人選擇揸車，而又好快飽和。以不斷起路、擴闊去改善塞車問題，就好似燈蛾撲火，最後都好可能係事倍功半。條路太多車，就好似不斷食、撐大左個胃，又再食更加多，形成一個惡性循環，稱為「供給誘導需求」(Induced Demand)。

2. 與其擴闊公路，我們支持以下幾個更加有效嘅辦法，去改善西貢公路塞車嘅問題：

- 泊車轉乘計劃：鼓勵大家泊低架車、轉巴士出入西貢。當區區議員何偉航曾經同運房局提出建議，局方卻表示不可行，因為西貢公路無大型集體運輸系統。然而，這顯然不是一個合理理由。只要有方便配套及具吸引力的優惠，巴士的泊車轉乘也能夠令擁車人士放棄駕車。如果加強現時公共運輸服務，喺區內外尋覓適當場地作泊車轉乘設施，再附以路線直接、班次頻密嘅巴士路線接駁，相信吸引力極高。

- 沿路設單車徑：西貢公路長 6.1 公里，由沿途村落踩單車往返西貢市，只需半個鐘左右。若有單車徑，更多西貢居民就能夠以單車代步，從而減少繼續揸車嘅誘因。少左人揸車，塞車得以舒緩，公共運輸嘅可靠性同吸引力亦都會提高。呢個良性循環，不單能夠減少碳排放，仲可以減少環境破壞同噪音污染。

- 局部改善樽頸位：何偉航指出，只需喺沿線十個位置進行局部改善工程，已經能夠處理樽頸位，同埋減少巴士小巴上落客對流量嘅影響。

3. 雖然西貢公路現時擁塞情況嚴重，擴闊至四線彷彿係最直接嘅解決辦法。但西貢公路沿途有唔少林木同濕地，擴闊工程必定會破壞西貢寶貴嘅生態和鄉郊面貌。工程亦需要向沿線嘅村落收地，將對居民生活造成重要影響。再講，西貢市中心嘅泊位一直緊拙，若擴闊後勢必有更多車進入西貢市，將市內嘅泊車、塞車問題加劇。

4. 西貢區需要停止過度發展，並且積極鼓勵使用公共運輸往返，才能真正改善公路擠塞、以至西貢市嘅交通問題。我們希望政府先認真研究上述的替代選擇，並且延長諮詢期，已與民共議的方式，解決西貢區整體的交通問題。