解構「15分鐘生活圈」概念
「15 分鐘生活圈」(15-minute city) 嘅討論近年在疫情期間被許多外國城市廣泛討論，你都可能已經聽過。到底「15 分鐘生活圈」點解會喺外國封城期間被重新提及？今日我哋就會同大家深入淺出地了解一下！
「15 分鐘生活圈」其實係一個希望透過改變城市人生活方式從而提升生活質素嘅城市規劃概念。概念由巴黎第一大學教授 Carlos Moreno 喺 2016 年提出。簡單而言，喺呢個概念中，無論係日常起居飲食、工作、醫療、教育、休憩公園，以致文化上嘅需要，都可以喺屋企步行或者踩單車 15 分鐘距離內滿足。除咗減低城市人對車輛嘅依賴性從而減低碳排放之外，同時亦鼓勵市民使用動態 (active) 嘅交通模式，借此推廣更健康嘅生活模式。Moreno 教授希望城市人能夠擺脫因居所附近缺乏足夠配套而被掣肘嘅行動模式，節省在交通運輸所花費嘅時間和金錢，重拾生活主導權。
除了交通上配合，概念另一個重點在於去中心化。呢種生活模式令人能夠縮窄並集中喺自己生活嘅社區，拉近社區網絡同鄰舍之間嘅關係。最理想嘅「15 分鐘生活圈」裏面，建築物都會配合混合用途發展，每棟建築物皆會包含多於一個用途。例如，學校夜晚可以開放俾大衆使用嘅社區中心。豐富社區内嘅配套後，區内居民會多左選擇，而唔駛吓吓都要穿梭唔同地區，亦可以滿足日常所需。
現時，世界各地陸續已經有唔同城市正採納呢一個規劃概念。2020 年初，巴黎市長 Anna Hidalgo 宣佈喺佢嘅連任競選中加入 「15 分鐘生活圈」嘅政策。其實公佈之前，市長喺 2014年起喺在任期間就一直已經進行有關理念嘅規劃政策。2016 年，政府落實改善 7 個市內具標誌性嘅廣場，包括法國大革命紀念銅柱所在嘅巴士底廣場。這些廣場原有設計主要作為地標用途，大多俾多條行車道圍繞住，可達程度非常低。新設計擴闊廣場內行人可以使用嘅空間至附近街道，增添樹蔭同休憩座位，減少行車線同時推廣低速行駛，從而營造出吸引人停留並使用嘅氛圍。
2018年，巴黎市政府嘅 Project Oasis 已經有投入資金去增加並重新設計學校的綠化空間，並且開放學校作爲公共空間，喺放學後給予民眾使用。呢啲學校鄰近嘅街道亦改為「校園友善街道」，限制或禁止車輛出入，並栽種了更多樹木、添置休憩位置。到現時，已經有超過40間學校完成改善工程。全巴黎約 800 間學校經已納入計劃範圍内，預計未來喺 2040 年會完成所有工程。
另外，以疫情為契機，政府為連接巴黎及鄰近地區，喺原有道路上多處加設臨時單車徑 (coronapiste)。隨住越來越多市民改為使用單車作為交通工具，其中嘅 50 公里已經落實成爲永久設施。目標為設立地區性單車網絡嘅 RER V 計劃亦獲得撥款，會喺將來興建一共650公里嘅單車徑。其他政策包括將停車場轉為公園、更改土地用途增加公共房屋供應、增設公共房屋設施，包括托兒所、藝術工作室、診所、餐飲等等。
當然，因應每一個城市嘅特點，「15 分鐘生活圈」並唔係一個可以直接複製應用喺每一個城市嘅罐頭答案。每個城市都可以有佢哋獨有對同一概念嘅演繹同改造。
自 2016 年起，西班牙巴塞隆拿嘅交通規劃政策就透過落實「超級街區」，減低市民出行對車輛嘅依賴性。一個超級街區大概以四百米長闊。車輛主要喺一個個方型街區外嘅主幹道行駛，而街區內嘅道路則禁止車輛，主要以步行或單車來往，增加行人同單車專用嘅道路空間同廣場。
而澳洲墨爾本就喺 2017 年開始規劃 20 分鐘城市嘅藍本。佢哋則由另一個角度出發，改善近郊地區嘅區內交通網絡通達程度，由道路設計出發去容納更多單車同行人設施，提高易行度。佢哋亦鼓勵近郊嘅新發展項目採取混合商住用途，提高房屋供應同時亦增設更多嘅工作類型同工作機會。
有外國媒體報道指出，通勤時間越長越會影響健康，增加癡肥、焦慮、壓力、抑鬱症、高血壓、頸椎痛症，甚至令離婚率增加。香港嘅居職分離問題不是一時三刻可以解決，好多香港人仍然要日日從新界出市區返工，但街道設計可以作出改動滿足日常需要，以增加公共空間為目標可能更切合公共需求。喺睇完咁多個實例之後，大家覺得如果係喺香港推行「15 分鐘生活圈」概念又可唔可行？不如襯最近多咗時間留喺社區，探索更多空間嘅可能性！
文 / Kristin Leung
參考資料
TED TALK - The 15-minute city Carlos Moreno
https://bit.ly/3q86xeS
BLOOMBERG - Paris’s 15 minute city could be coming to and urban area near you
https://bloom.bg/3u7Vyn8
EURONEWS - What is a '15-minute city' and how will it change how we live, work and socialise?
https://bit.ly/3MWJwFq
VOX - It's not you. Commuting is bad for your health.
https://youtu.be/kfPNxNIDHrA